Утырышта ТР Дәүләт Советы Рәисе Фәрит Мөхәммәтшин, республика Премьер-министры Алексей Песошин, шәһәр һәм район башлыклары, шулай ук министрлык һәм ведомство вәкилләре катнашты, дип хәбәр итә ТР Рәисе матбугат хезмәте.

Катнашучылар балигъ булмаганнар арасында төркемле җинаятьләрне булдырмау, мәгариф учреждениеләрендә буллинг һәм яшүсмерләрне диверсия һәм террорчылык эшчәнлегенә җәлеп итү буенча өстәмә чаралар турында фикер алыштылар.

Рөстәм Миңнеханов сүзләренчә, күп кенә яшүсмерләр хокукка каршы гамәлләрнең авыр нәтиҗәләргә китерергә мөмкинлеген аңламый. Аның сүзләренчә, бер үк вакытта Украина неонацист төркемнәренең активлыгы көчәйгән, алар Россия гражданнарын, беренче чиратта яшьләрне, диверсия-террорчылык актларын кылу өчен вербовкаларга тырыша.

Рәис сүзләренчә, мондый эшчәнлекнең нәтиҗәсе мәктәпләрдә һәм башка уку йортларында һөҗүмнәр була. Соңгы айларда илдә берничә шундый очрак булды.

Яшүсмерләр арасында җинаятьләрнең шактый өлеше деструктив контент һәм социаль челтәрләр йогынтысында башкарыла, анда еш кына җинаятьчеләрне геройлаштыру һәм популярлаштыру баруын билгеләп үтте Миңнеханов.

Ул билгеләп үткәнчә, балигъ булмаганнар эшләре буенча комиссияләр эше һәм хокук бозуларны профилактикалау белән шөгыльләнүче барлык структураларның үзара хезмәттәшлеге шәһәр һәм район башлыкларының шәхси җаваплылыгында.

Сүз уңаеннан, хәзерге вакытта Татарстанда «Гаилә» илкүләм проекты гамәлгә ашырыла.